ನಮ್ಮವಳು

ನಿನ್ನ ತುಟಿಯಂಚಿನಲಿರುವ ಆ ನಗುವ

ನಿನ್ನ ಕಣ್ತುಂಬ ಕವಿದಿರುವ ಆ ನೋಟವ

ನಿನ್ನ ಕೊಸರುವುಸಿರಿನಲಿರುವ ಆ ಸ್ಪರುಷವ

ನೆನೆದು ನೆನೆದು ನಡೆಸಿರುವೆನ್ನ ಜೀವನವ

**********

ನೀನು ಪಸರಿಸಿದ ಪ್ರೀತಿಯ ಪಿಸುಮಾತುಗಳನು

ಭಾವನೆಗಳಿಂದಲಂಕರಿಸಿ ಮನಸಿನಿಂದಾಲಿಸುವೆನು

ನೀನು ತೋರಿದ ಸರಸವಿರಸಗಳ ಸಾನಿಧ್ಯವನು

ಅರಿತು ಬೆರೆತು ಎದೆಯಾಳದಿಂದ ಆಲಂಗಿಸುವೆನು

**********

ನೀನೇ ನಮ್ಮ ದನಿಯು ಸ್ವರ ಸಂಗೀತದಲೆಯು

ನೀನೇ ನಮಗೆ ಬೆಳಕು ಬೆಳಗಲಿರುಳಲೂ ಬದುಕು

ನೀನೇ ನಮ್ಮ ಉಸಿರು ನಮ್ಮ ಅಸ್ತಿತ್ವದ ಹೆಸರು

ನೀನೇ ನಮಗೆ ಮೋಕ್ಷವು ಅನಂತಾನಂತಾನಂದವು

ಪ್ರೀತಿಯ ಮೂಲ

ಅರುಣನುದಯಿಸಿದ ಆಗಸದಲಿ

ಬೆಳ್ಳಕ್ಕಿಗಳ ಸಾಲು ಸುರಿಯುವ ದೃಶ್ಯವು ನೀನು

ಜುಳುಜುಳುವ ನದಿಯ ದಡದಲಿ

ಕೇಳಿಬರುವ ಕೋಗಿಲೆಯ ಇಂಚರವು ನೀನು

ಹಸಿರು ಚೆಲ್ಲಿದ ಬನದಲಿ

ಅರಳಿದ ಮಲ್ಲಿಗೆಯ ಪರಿಮಳವು ನೀನು

ಹರಿವ ತಂಗಾಳಿಯು ಇರುಳಲಿ

ಮೈಮನಕೆ ಕೊಡುವ ಸ್ಪರುಷವು ನೀನು

ನಿನ್ನ ಕೆಂದಾವರೆಯಂತಹ ಕೆನ್ನೆಯಲಿ

ಮುತ್ತಿನ ಮಳೆಯನೇ ಹರಿಸುವೆನು

ನಿನ್ನ ಮುದ್ದಾದ ಮೊಗದ ಗಲ್ಲಗುಳಿಯಲಿ

ಸಮರಸದ ಸವಿಜೇನನೇ ತುಂಬುವೆನು

ಆದಿ ಅಂತ್ಯಗಳಾಚೆ ನಮ್ಮ ಮನೆಯಿರಲಿ

ಅದನು ಬೆಳಗುವ ಚೇತನವೇ ನೀನು

ಸರಸವಿರಸಗಳ ನಮ್ಮೀ ಬದುಕಿನಲಿ

ನನ್ನ ಪ್ರೀತಿಯ ಮೂಲವೇ ನೀನು

ನಾನು, ಅನಂತತೆ, ಅಸ್ತಿತ್ವ

ಓ ಸೃಷ್ಟಿಯೇ, ನೀನು ನನಗೆಷ್ಟು ಸ್ವಂತ? ನನ್ನೀ ಜೀವನದುದ್ದೇಶವೇನು? ನನ್ನ ಅಂತರಾಳಕ್ಕೆ ಉಸಿರನ್ನು ಕೊಡುವವರು ನನಗೆ ದೊರಕುವವರೆಗೂ ನಾನು ನಿನ್ನನ್ನು ಅರಿಯಬಯಸುವೆನು. ನೀನು ನನಗೊಂದೇ ಜೀವನವನ್ನು ನೀಡಿದ್ದರೂ ನಾನು ನನಗೆ ಹಲವಾರು ಜೀವನವನ್ನು ನೀಡಿರುವೆನು. ಆದರೆ ಇಂದು ನನ್ನಂತರ್ಮುಖಿಯನ್ನಂತ್ಯಗೊಳಿಸಿ, ನಿನ್ನನ್ನು ನಿನ್ನ ದೃಷ್ಟಿಯಿಂದಲೇ ನೋಡಿ ತಿಳಿಯಬಯಸುವೆನು ನಾನು. ನೀನೂ ಅಮರಳಲ್ಲ, ನಾನೂ ಅಮರನಲ್ಲ. ಅನಂತತೆಯಲಿ ನಮ್ಮಿಬ್ಬರಿಗೂ ಅಸ್ತಿತ್ವವಿಲ್ಲ. ಅನಂತತೆಗೆ ಅರ್ಥವೆಂಬುದಿಲ್ಲ!

ನನ್ನ ಹೊರಗೆ ನನ್ನವರನು ಹುಡುಕಿ ನಿನ್ನೆಯವರೆಗೆ
ನನ್ನೊಳಗೆ ನಾನಿಂದು ಅರಿತೆನು ನಾನೊಬ್ಬನೆ ನನಗಿನ್ನು
ನವ ವಿಚಾರಗಳ ನವ ಜ್ಞಾನಗಂಗೆಯು ನನ್ನೊಳಗೆ
ನನ್ನನೇ ಗೆಲ್ಲಿಸಿ ಹರಿದು ಸೇರಿತು ನನ್ನಂತರಾತ್ಮವನು

ನಾನಡಗಿರುವೆನಿಂದು ನನ್ನೆದೆಯ ಕೊನೆಯ ದನಿಯಲಿ
ನನ್ನ ಕಾಲವನ್ನೆಲ್ಲಾ ಕಳೆದು, ಮರೀಚಿಕೆಯಲಿ ಮಿಂದು
ಅಂತರ್ಮುಖಿಯು ಸತ್ಯ ಅಸತ್ಯಗಳಾಚೆ ಮರೆಯಾಗಲಿ
ಉಸಿರಿರಲಿ, ಹೆಸರಿರಲಿ, ಅಂತಿಮಾನಂದವನರಿಯಲಂದು

ನಾನಿನ್ನು ನನ್ನವನಲ್ಲ, ನಾನು ಅವಳದಂತೂ ಎಂದೆಂದಿಗೂ ಅಲ್ಲ
ಮರೀಚಿಕೆಯೇ ನಿಜ ನನ್ನದೆಂಬುದೆಲ್ಲ, ಅನಂತತೆಯಲಸ್ತಿತ್ವವೆಂಬುದಿಲ್ಲ

ಒಲವಿನ ಪರಿಮಳ

ಎರಡು ದಿನಗಳ ಜೀವನ, ಕೆಲ ಕ್ಷಣ ಒಂಟಿ ಪಯಣ, ಕೆಲ ಕ್ಷಣ ಎರಡು ಹೃದಯಗಳ ಮಿಲನ. ನಿನ್ನ ನೆನಪಲಿ ಬಡಿದ ಪ್ರತಿಯೊಂದು ಎದೆಬಡಿತವು ಮೂಡಿಸಿತು ಶಾಂತ ಆಗಸದಲಿ ವಿರಹದ ಅಲೆಗಳನು. ಆ ಅಲೆಗಳ ಆರ್ಭಟಕೆ ಅಸ್ತವಾಗುತಿರುವ ಸೂರ್ಯನು ಚದುರಿ ಕಣ್ಮರೆಯಾಗುತಿಹನು ಭುವಿಯೊಳು. ಕೆಂಪು ಆಗಸದ ಮೇಲೆ ತಂಗಾಳಿ ಕರೆತಂದ ಆ ಚಂದಿರನ ಸೌಂದರ್ಯದಲಡಗಿರುವ ನಿನ್ನಾತ್ಮಕೆ ಈ ಪದಗಳಿಂದ ನನ್ನುಸಿರನು ಕೊಡಬಯಸುವೆನು....

ಮುಸ್ಸಂಜೆಯ ಮಳೆಹನಿಗಳು ಕೊಡುವ ವಿಸ್ಮಯ ಸ್ಪರುಷ
ಮನದಲಿ ನಿನ್ನನೇ ನೆನಪಿಸಿ ಚಿಮ್ಮಿಸಿದೆ ನವಿರಾದ ಹರುಷ
ಈಗಲೋ ಆಗಲೋ ನಿನ್ನನೇ ನೋಡುವ, ಸೇರುವ ತವಕ
ಮಿಂಚಿಗೆ ರಾತ್ರಿ ಹಗಲಾಗುವ ಹಾಗೆ ನಿನ್ನ ಮಾಯೆ ಮೋಹಕ

ಒಲವಿಗೆ ಒರಗಿಂದು ನಾನು ಕಲೆಗೂ ಕೃತಿಗೂ ಮೀರಿದ
ಜೀವನವನು ಹೆಣೆಯುತ ಸೇರಿಹೆನು ಗೂಡನು ದೂರ ತೀರದ
ಹಗಲಿರುಳು ಪ್ರತಿ ಉಸಿರು ನಿನ್ನ ಹೆಸರನೇ ಹೇಳುತ
ಕಲ್ಪನೆಗೂ ಮೀರಿ ನಡೆದೆನು, ಬೆಳೆದೆನು ನಿನಗೆ ಸೋಲುತ

ಮೌನವನು, ಮಾತುಗಳನು ಮೀರಿದ ನಮ್ಮ ಮನಸುಗಳು
ಬದುಕಿಗರ್ಥವನು ನೀಡಿ ಮುಳುಗಿವೆ ಅನಂತ ಆನಂದದೊಳು
ಉದಯಾಸ್ತಗಳು ಪ್ರತಿದಿನವೂ; ಈ ನಡುವೆ ಯಾರದು ಗೆಲುವು?
ನಿನ್ನೆ ಅರಳಿದ ಹೂವುಗಳು ನಾವು, ನಮ್ಮ ಪರಿಮಳವೇ ಒಲವು!

ನಿರಂತರ ಪ್ರೀತಿ

ನೀ ನೋಡುವ ನೋಟ ಸುಂದರ, ನಿನ್ನ ನಯನಗಳೇ ಮನೋಹರ
ನೀ ಹೇಳುವರ್ಥವು ಶೃಂಗಾರ, ನಿನ್ನ ಮನಸೇ ಸರೋವರ
ಇರುಳಲಿ ಧರತಿಗೆ ನಿನ್ನ ಮೋಹಕ ನಗುವೇ ಅಲಂಕಾರ
ಜೀವನದಲಿ ನೀನು ಹರಿಸುವ ಸ್ನೇಹದ ಕ್ಷಣಗಳೇ ಸುಮಧುರ

ಹಸಿರು ವರ್ಣದ ವನದಲಿ, ವಿಸ್ಮಯ ಶ್ವೇತಪುಷ್ಪಗಳ ಸಾಲಲಿ,
ಸೃಷ್ಟಿಯಾದ ಸೌಂದರ್ಯ ಶೋಭಿಸುತಿಹುದು ನಿನ್ನ ಮುಖದಲಿ
ಮುಗಿಲ ಮೋಡಗಳು ಮನಸಿಗೆ ಹಂಸದಂತೆ ಭಾಸವಾಗುವ ಸಂಜೆಯಲಿ,
ಕಾಣುವ ಸುಂದರ ಸೂರ್ಯಾಸ್ತ, ಬೆರೆತಿಹುದು ನಿನ್ನ ಬದುಕಿನ ಪ್ರತಿಕ್ಷಣದಲಿ

ಸೃಷ್ಟಿಯು ಬಿಡಿಸಿದ ಚಿತ್ರದಲಿ, ಸೌಂದರ್ಯವೇ ನನ್ನುಸಿರಾದಂತಹ ಸ್ಥಳದಲಿ,
ಮರುಧ್ವನಿಯ ಮಾಧುರ್ಯವನು ಸವಿದೆನು, ನಿನ್ನ ಹೆಸರನು ಮನಸಾರೆ ಕೂಗಿ
ನಿನ್ನ ಮನಸಿನ ಧ್ವನಿಯಲಿ ನನ್ನುಸಿರಿನ ಸ್ವರವಿರಲು, ಆ ಅತಲ ಪಾತಾಳದಲಿ
ಅಡಗಿದ್ದರೂ ಅರಸಿಬರುವೆನು ನನ್ನ ಜೀವನವನೇ ನಿನಗರ್ಪಿಸಲು ಪ್ರೀತಿಗಾಗಿ

ಸಮಯದ ಸುಳಿಗೆ ಸಿಗದೇ ಸೇರುವೆನು ನಿನ್ನನು, ನಿನ್ನ ಪ್ರೇಮಸಿಂಧುವಾಗಿ,
ಪಾರಿಜಾತ ವನದಲಿ ಚಿಮ್ಮುವ ಪನ್ನೀರಿನ ಸೇಲೆಯಂತಹ ನಿನ್ನ ಸ್ನೇಹಕೆ,

ಸೋತು ಬಯಸಿದೆನು ನಿನ್ನ ಸನಿಹವನು, ಚುಂಬಿಸುವೆನು ಇಂಚರವಾಗಿ

ನಿನ್ನಯ ಹೃದಯ ಬಡಿತಗಳನು, ನಿರಂತರವಲ್ಲವೀ ನಮ್ಮ ಪ್ರೀತಿಯ ಬೆಸುಗೆ?

ಕೊನೆಯ ಉಡುಗೊರೆ

ನೀನರಿಯೆಯಾ ನನ್ನ, ಹೊಂಬಿಸಿಲಲಿ ಹೊಳೆವ ಹವಳದಂತಾ ನನ್ನ ಕಣ್ಣ?
ಹಸಿದ ಹೊಟ್ಟೆಯಲೂ ನಿನ್ನ ಕನಸನೇ ಕಂಡ ಹೂವಿನಂತಾ ನನ್ನ ಮನಸ್ನ?
ಹರಿದು ಹೋದಿ ಮತ್ಯಾಕ ನನ್ಮನದೊಳಗ ಹೊಳೆಹಾಂಗ, ಹನಿಯೊಂದನುಣಲೂ ಕೊಡದ?
ಬನವೆಲ್ಲ ಬರಿದಾಗಿ ಬರಡಾತು ಭೂಮಿ, ಬಾಡಿಹೋತು ಬದುಕು ನೀನಿಲ್ದ

ಕೊನೆವರೆಗೂ ನಿನ್ನ ಬಯಸಿದ ಮನಸು, ಕಗ್ಗತ್ತಲಲೂ ನಿನ್ನನೆ ಕಲ್ಪಿಸುವಂತಾ ಹುಚ್ಚು ವಯಸು
ಬೆಳಗಾತು, ಬಾಗಿಲಲಿ ಕಾದು ಕಾದು ನಿನ್ನ ಹಾದಿ, ಜೀವಾನ ಗಟ್ಟಿ ಹಿಡಿತ
ತೋರಣಾನ ಮುತ್ತಿದ ಇಬ್ಬನಿ, ಕರಗಿ ಕಚ್ಚಿತು ನನ್ನ ಕಣ್ಣ ರೆಪ್ಪಿನ
ತಂಪು ಕಣ್ಣುಗಳನಾವರಿಸಿ ತಂತು ಹಿತವಾದ ಹರೆಯದ ನೆನಪುಗಳನ
ಸಾಕಿಂತಾ ಜೀವನ, ಪ್ರೀತಿಯಿಲ್ಲದ ಪಯಣ, ನಾ ಕೊಲ್ಲಬಲ್ಲೆನಾ ಈ ನೆನಪುಗಳನ?
ಯಾವಾಗ ಬರುವಿ ಹೇಳು ನಮ್ಮನಿಗ, ನಿನ್ನ ಪೂಜಿಸುವ ಗುಡಿಗ, ನಾ ಸಾಯುವ ಮೊದಲು
ನನ್ನಾತ್ಮಾನ ಸುಟ್ಟು ಹಚ್ಚತೀನಿ ದೀಪ, ನನ್ನ ಕೊನೆಯುಸಿರ್ನ ನಿನಗುಡುಗರೆಯಾಗಿ ಕೊಡಲು

ಮೌನ ನೆನಪು

ಇದು ನಿನಗಾಗಿ ಬರೆದ ನನ್ನ ಮೌನ ಮನಸಿನ ಮಧುರ ಸಂದೇಶ
ಹೂಮುಡಿದ ಪದಗಳ ಜೋಡಿಸಿ ನೀಡುವೆ ನಿನ್ಮನಕೆ ನೂತನ ಸ್ಪರುಷ
ನಿನ್ನಯ ಸಂಜೀವಿನಿ ಸ್ನೇಹಕೆ ಸೋತು ಹರಿಸುವೆ ಹಿತವಾದ ಹರುಷ
ಈ ದಿನಕಾಗಿ ಕಾದು ಕೊಡುವೆ ಪೂರ್ಣಿಮೆ ಪರಿಮಳವ ಪ್ರತಿ ವರುಷ

ಹಾರಿ ಹಾರಿ ಹಿಡಿಯಹೋದೆ, ನಿನಗಾಗಿ ಹಸಿರು ಹಕ್ಕಿಯೊಂದನು
ಭುವಿಬಾನುಗಳು ಬರಿದಾದರೂ ಬಿಡನೆನ್ನಚಲ ಹಠವನು
ಬೆಳಕು ಬಾಡಿ ಇರುಳರಳುವುದರಲಿ ಹಿಡಿದದಕೆ ನಿನ್ನ ಹೆಸರಿಟ್ಟೆನು
ಅದರ ಹಾಡಿಗೆನ್ನೆದೆಬಡಿತವ ಪೋಣಿಸಿ ಸಂಗೀತದುಡುಗರೆಯ ಕೊಡುವೆನು

ಮನಸಲೇ ಮನೆಯ ಬೆಳೆಸುವೆನು ಸವಿಯುತ ಸಾಗರದ ಸೌಂದರ್ಯವನು
ಉಸಿರಿನ ಬಿಸಿಯನೇ ಬಳಸುವೆನು, ಬೆಳಗಲು ಭಾವನೆಯೆ ಬಾಗಿಲನು
ನೇಸರನ ಕಿರಣಗಳನೇ ಉಂಡು, ಇರುಳಿಡೀ ಮನೆಗೆ ದೀವಿಗೆಯಾಗುವೆನು
ನೇಹದ ಸ್ಪರುಷವನ್ನೀಡುವ ಗೋಡೆಗಳನು, ನಿನ್ನಯ ನೆನಪುಗಳಿಂದಲಂಕರಿಸುವೆನು

ಹಸಿವನೇ ಕೊಂದು ಹೊತ್ತು ತರುವೆನು ನಿನಗಾಗಿ, ಪ್ರೀತಿಯ ಪಲ್ಲಕ್ಕಿಯಲಿ ಪ್ರೇಮದಮೃತವ
ಪ್ರಾಣವನೇ ಪಣತೊಟ್ಟು ಕೊಡುವೆನು ನಿನಗೆ ಪ್ರತಿಚಣವೂ ಹೊಸಜನುಮದನುಭವವ
ಈ ದಿನವೂ ನಿನ್ನ ಪ್ರತಿದಿನದ ದನಿಯಾಗಲಿ, ಕೊಡಲಿ ಸ್ವರ ರಾಗಗಳು ನಿನಗೆ ನಿರ್ಮಲ ರೂಪವ
ಮೌನದನಂತತೆಯು ನಿರಂತರವಾಗಿರಲಿ, ನೀಡಲಿ ಸಮಯವು ನಿನಗೆ ಸತ್ಯಸ್ವರೂಪವ