ಭವ್ಯ ಭಾರತ

ಈ ಭವ್ಯನಾಡ ಬೆಳಕಿನಲಿ ಕಾಣುತಿರುವುದು ಹಸಿರು
ಇದರ ಹಸಿರಿನ ಉಸಿರಲಿ ಕುಣಿಯುತಿಹದು ನವಿಲು
ಆ ನವಿಲ ನಗೆಯ ಕಣ್ಣಲಿ ಮಿಂಚುತಿಹುದು ಪ್ರೇಮವು
ದೇಶಪ್ರೇಮದ ಗಾಳಿಯಲಿ ಹಾರುತಿಹುದು ತ್ರಿವರ್ಣಧ್ವಜವು

ಹರಿಯುತಿರುವ ನದಿಯು ಸಹಿತ ಹಾಡುತಿದೆ ಗೀತೆಯನು
ಅರಳುತಿರುವ ಕಮಲವು ನಮಿಸುತಿದೆ ನಾಡನು
ಗರ್ಜಿಸುವ ಹುಲಿಯು ನೆನೆಯುತಿದೆ ನಾಯಕರನು
ಈ ದಿವ್ಯನಾಡ ಕೀರ್ತಿಯನು ಬೆಳಗುತಿದೆ ಜಗವನು

ದೀರ್ಘ ಕಾಲದ ಉಸಿರಲಿ ಅಸಂಖ್ಯ ಗಣ್ಯರು ಜನಿಸಿದರು
ಅಲ್ಪಕಾಲದ ಆಯುವಲಿ ಅಮೂಲ್ಯ ಕೊಡುಗೆಯ ನೀಡಿದರು
ಅವರ ಯಶಸಿನ ಸ್ಫೂರ್ತಿಯು ಈ ನಾಡ ಮಣ್ಣಿನ ಮಹಿಮೆಯು
ಈ ನಾಡ ಮಹಿಮೆಯನರಿಯಲು ನೂರು ಜನುಮಗಳು ಸಾಲವು

ಹುಟ್ಟುವ ಪ್ರತಿ ಮಗುವಲಿ ಶಾಂತಿ ಅಹಿಂಸೆ ತುಂಬಲಿ
ಯುವಕರ ಮನದಲಿ ತ್ಯಾಗದೀಪವು ಬೆಳಗಲಿ
ದೇಹದ ಅಣು ಅಣುವಲಿ ದೇಶಪ್ರೇಮ ಮೂಡಲಿ
ಹಾರುವ ಬಾವುಟದ ಭವಿಷ್ಯ ಉಜ್ವಲವಾಗಲಿ